2025-yil 25–26-sentabr kunlari Olmaotada Markaziy Osiyo mintaqasida peering va bog‘lanish bo‘yicha To‘rtinchi forum (CAPIF 4) bo‘lib o‘tdi — mintaqa internet industriyasi uchun muhim tadbirlardan biri. Forum RIPE NCC tomonidan tashkil etilgan bo‘lib, Qozog‘iston Internet Assotsiatsiyasi va Qozog‘iston Aloqa Operatorlari Assotsiatsiyasining hamkorligi bilan o‘tkazildi.

CAPIF Markaziy Osiyodagi provayderlar o‘rtasida internet-trafik almashinuvi va peeringni rivojlantirish, kontent-provayderlarni jalb qilish va mintaqaning ichki va tashqi bog‘lanishini oshirish uchun platforma sifatida xizmat qiladi. Forum shuningdek, Markaziy Osiyoni raqamli va infratuzilma markazi sifatida targ‘ib qilishga hissa qo‘shadi.

Joriy yil tadbirida 22 mamlakatdan taxminan 280 nafar delegat ishtirok etdi, ular orasida telekom kompaniyalar, bank sektori, akademik muassasalar va davlat tashkilotlari vakillari bor edi.

.UZ domeni ma’muriyati boshlig‘i IPv6 texnologiyasini .UZ domen zonasida joriy etish bo‘yicha ma’ruza va taqdimot o‘tkazdi, mamlakat internet infratuzilmasini rivojlantirish bo‘yicha erishilgan yutuqlar va rejalarni namoyish etdi.