2025-yil 10-13 fevral kunlari Hongkongda Osiyo-Tinch okeani yuqori darajali domenlar assotsiatsiyasining 87-konferensiyasi (Asia Pacific Top Level Domain Association — APTLD87) bo‘lib o‘tmoqda. Bu muhim tadbir domen sanoatining yetakchi mutaxassislari, milliy reyestr vakillari va internet boshqaruvi bo‘yicha ekspertlarni jamlagan.

APTLD87 ccTLDlarni boshqarish bilan bog‘liq keng qamrovli masalalarni qamrab oladi. Asosiy mavzular: kiberxavfsizlik, domen sanoatini tartibga solish, texnologik innovatsiyalar, domen zonalarining rivojlanish strategiyalari va xalqaro hamkorlik. Bundan tashqari, ko‘p tilli domenlarni joriy etish, internet infratuzilmasining barqarorligi va kiberxavflarning oldini olish masalalariga ham e’tibor qaratiladi.

.UZ domeni ma`muriyati konferensiyada onlayn formatda ishtirok etmoqda. Muhim chiqishlardan biri .UZ domen zonasidagi Domen auksioni bo‘yicha taqdimot bo‘ldi. Unda blokcheyn va sun’iy intellekt asosida ishlaydigan platformaning texnologik jihatlari hamda premium domenlarni taqsimlashning yangi mexanizmining afzalliklari namoyish etildi. Bu loyiha O‘zbekiston milliy domen makonini rivojlantirish yo‘lida muhim qadam bo‘lib, qimmatli domen nomlarini boshqarishda shaffoflik va samaradorlikni oshirishga qaratilgan.

Shuningdek, "DS Automation, .UZ Experience" mavzusidagi taqdimot ham bo‘lib o‘tdi. Unda DNSSEC (Domain Name System Security Extensions) delegatsiya va boshqaruv tizimini avtomatlashtirish bo‘yicha zamonaviy yondashuvlar ko‘rib chiqildi. .UZ domenining xavfsizlik kalitlarini boshqarish jarayonini avtomatlashtirish borasidagi yutuqlari taqdim etilib, bu milliy domen zonasining ishonchliligini oshirishga xizmat qilishi qayd etildi. Bu tajriba o‘z infratuzilmasini modernizatsiya qilishga intilayotgan boshqa ccTLD reyestrlari uchun muhim yo‘nalish bo‘lishi mumkin.

APTLD87 mintaqadagi milliy domenlarning kelajagini shakllantirishda muhim rol o‘ynaydi. Tajriba almashish, zamonaviy muammolarni muhokama qilish va ilg‘or texnologiyalarni joriy etish orqali konferensiya ccTLD reyestrlarining pozitsiyalarini mustahkamlashga, internet makonining xavfsizligi, barqarorligi va innovatsion rivojlanishiga xizmat qiladi.